C.O.D.

Hver veit hvað það þýðir? Það veit ég. Þýðingin er margslungin, skal ég segja ykkur. Í fyrsta lagi þýðir þetta cash on delivery, sem samlandar mínir ef til vill þekkja betur sem póstkröfu. Í öðru lagi þýðir þetta complément d’objec direct, sem myndi líklega kallast beint andlag eða eitthvað svoleiðis á íslensku. Í þriðja lagi er cod þorskur. Ég er svo klár.

Ég sá alveg hrikalega asnalega stelpu fyrir utan Lögberg á þriðjudagsmorguninn. Hún þóttist vera voða gella í nýjum skóm sem hún keypti sér á sunnudaginn, en hvað gerðist… þegar hún kom niður tröppurnar missti hún skyndilega jafnvægið og hrundi á gangstéttina! Taskan hentist til hliðar og hún lá þarna og bar sig aumlega á meðan hún fálmaði eftir gleraugunum sem feyktust af henni við atvikið. Æ og ó hvað hún meiddi sig. Svo var gellan í pilsi og sokkabuxurnar urðu eins og gatasigti! Ég… eh, ég meina hún… þurfti að halda beinustu leið í 10-11 eftir tímann til að kaupa nýjar, og er nú öll rauð og rispuð á sköflungnum. Greyið litla, ég vorkenni henni. Þessari ókunnu stúlku.

Um daginn var bókmenntahátíð og ég lét hana næstum því fram hjá mér fara… neeeema ég fór á fyrirlestur hjá Jung Chang og var það vel. Ég keypti bókina hennar um Maó og hlakka til að lesa hana, en þar sem ég hef sett mér það markmið að byrja ekki á henni fyrr en ég er komin á rétt ról í skólanum gæti það dregist eitthvað. Hún verður þá bara hilluprýði á meðan.

Myndband #11: Einn heimur – eitt heit

Letiletiletihelgi! Góði guð. Ég náði nú samt að gera herbergið mitt snyrtilegt og fínt, auk þess sem ég hef prentað út heilu regnskógana af heimspekigreinum. Setti líka inn myndir af Jamboree á Facebook… og vesenaðist í cuddlesíðunni. Þar má finna myndir af Handverkshátíð, fréttir og fleira gaman. Endilega skrifa í gestabókina – www.cuddlemeclothes.com.

Myndband mánaðarins er af lokahátíðinni á Jamboree. Þarna er verið að syngja mótslagið góða, verst að við náðum ekki Jambo-partinum á band!

Rúdolf með rauða nefið

Ég er með nefrennsli af verstu sort. Sortinni sem læðist og laumupokast hægt og bítandi þar til maður situr allt í einu í miðri kennslustund með hortaum úr nösinni, sem eigi hverfur þegar maður sígur upp í nefið. Haustkvefið komið? Ég hringdi í Þórunni í dag og hún var lasin. Þar af leiðandi kenni ég henni um. Thanks a lot!

 Nú skal ég hætta að skrifa um hor.

Stundum er eins og einföldustu hlutir reynist mér flóknir. Hlutir eins og að leggjast til svefns og að læsa bíl með fjarstýringu. Fyrr í vikunni ætlaði ég aldeilis að henda mér í rúmið að loknum löngum og ströngum degi. Það gekk ekki betur en svo að ég virðist hafa misreiknað lengd mína dulítið og skallaði vegginn svona glæsilega. Fyrir utan það að ég áttaði mig síðar á því að ég var ekki komin í náttföt. Í gær lagði ég svo bílnum á bílastæði HÍ, í mesta rigningarveðri sem ég hef augum litið á minni stuttu ævi. Ýtti á takkann á fjarstýringunni til að læsa, en þar sem ég sá engin ljós ákvað ég að dobbel tékka og ýta aftur. Barðist ég svo mót veðurhamnum í kennslustund. Einum og hálfum tíma síðar, þegar ég sneri aftur, mætti mér óvenjuleg sjón. Skottið galopið og innihald þess, tveir tómir pappakassar, nánast orðnir að mauki vegna rigningarinnar. Þar sem opna-skottið-takkinn er við hliðina á læsa-bílnum-takkanum tel ég það líklegt að ég hafi ýtt á rangan takka í fyrra skiptið eh eh eh…

Ég hef hafið störf við símasölu hjá Glitni og líkar vel. Vetrarrútínan er að komast í gang, maður verður bissí bissí en það er bara gaman.

Og já – Ég er að fara að heimsækja Frances til U.S.A. í tvær vikur 15. nóvember! Thanksgiving here I come!

Holy moly

Það er aldrei lognmolla í HÍ, ónei. Þeir reyna eins og þeir geta að hafa hlutina spennandi! Til dæmis vissi ég ekki fyrr en 22:00 í gærkvöldi hvaða stofu ég ætti að vera í kl. 10:00 í morgun… þangað til hafði alltaf staðið “óákveðið” inni á Uglunni. Svo kom þetta inn og þar stendur: “Nk – salur 1 (kjallari)”. Ég kom af fjöllum – Nk? Í ljós kom að þetta er ekkert minna en sjálf Neskirkja. Mér leið eins og ég væri að mæta á fund í kvenfélagi, en ekki virðulegan fyrirlestur um Bjólfskviðu í Breskum bókmenntum II. Þar til orgelleikurinn hófst. Þá var nú kominn virðulegur, ef ekki bara heilagur bragur á þetta allt saman.

Svo kom URGENT MESSAGE varðandi Shakespeare áfangann minn áðan. Hann er ekki bara búinn að skipta um stofu, heldur tíma líka! Neibb… aldrei lognmolla.

Fyrsti skóladagurinn

Þetta verður stutt og laggott því ef ég borða ekki neitt áður en ég fer í fyrsta tímann í Heimspekilegum forspjallsvísindum óttast ég að garnagaulið muni bergmála svo hátt í stóra salnum í Háskólabíó (sem tekur víst 1000 manns) að kennarinn neyðist til að reka mig út. Þannig vil ég ekki byrja önnina. Mér finnst nógu slæmt að eiga í basli með að skilja suma leslistana mína. Ég er nefnilega búin að breyta skráningunni minni í 60 einingar ensku/60 einingar frönsku, at last! Þar sem Enskar mállýskur voru því miður felldar niður sá ég mér leik á borði að byrja aðeins á frönskunni og skráði mig í Franska málfræði I og Ritun I. Ég held að orðabókar sé þörf til að ég geti skilið áfangalýsingarnar þar fullkomlega, en þetta hlýtur nú samt að reddast. Einhvern veginn grunar mig að Passé composé/Imparfait æfingar muni koma fyrir í áfanganum, en það veit guð að ég kannast við slíkt. Verra finnst mér að skilja ekki leslistann í forspjallsvísindunum, þar sem hann er jú á íslensku.

Borða. Núna.